@@ ဒီမနက် ခရီးထွက်ခဲ့
မဖြတ်သန်းဖူးသေးတဲ့ ဒီနေရာ
မမြင်ခဲ့ဖူးသော ဒီရှုခင်း
မမေ့နိုင်ခဲ့သော ဒီခံစားမှုလေးများ
မျှဝေခံစား ကြည့်စို့လား။
@@ ဒီလမ်းမပေါ်မှာ
စာမသင်ရသေးတဲ့
ကလေးငယ်လေးတွေကိုလည်း
တွေ့ခဲ့တယ်။
ဒီလမ်းမပေါ်မှာ
ဆရာ မလုံလောက်ပေမယ့်
စာတတ်အောင်သင်ပေးနေတဲ့
ဆရာတွေလည်း တွေ့ခဲ့တယ်။
@@ ဒီလမ်းမပေါ်မှာ
တစ်ရွာလုံး ဆယ်တန်းအောင်ဖို့ဝေး
စာတတ်တဲ့သူက ဦးဆောင်တာ
ရှားနေသေးတာကိုလည်း
တွေ့ခဲ့တယ်။
ဒီလမ်းမပေါ်မှာ
ပညာမရှိပေမယ့်
ပညာရှိတဲ့သူတွေထက်
စီးပွားရှာနိုင်သူတွေလည်း တွေ့ခဲ့တယ်။
@@ ဒီလမ်းမပေါ်မှာ
ဘယ်မှာမှ မရနိုင်တဲ့
ရှုခင်းလှလှတွေလည်းရှိတယ်။
ဒီလမ်းမပေါ်မှာ
အချိန်အတိုင်းအတာ တစ်ခုအထိ
စောင်မျှော်ရအုံးမယ့်
တိုးတက်မှု အလှမ်းနှေးနေတာလည်းရှိတယ်။
@@ ဒီလမ်းမပေါ်မှာ
ခဏတာသာ
ပညာလာပေးသူများသမို့
ဒေသခံပညာတတ် ဇာတိအတွက်
ပေးဆပ်သူတွေ အများကြီးလိုနေတာလည်း
တွေ့လိုက်ရတယ်။
ဒီလမ်းမပေါ်မှာ
မြို့ပြက အိမ်ကို ခဏထားပြီး
အခိုင်အမာ ဆိုင်ဖွင့်လို့
စီးပွားရှာနေသူတွေလည်းရှိတယ်။
@@ ဒီလမ်းမပေါ်မှာ
ယာဉ်လိုင်ကားမှ
ပြေးဆွဲမှု မရှိသေးတာလည်း
သိရှိရတယ်။
လမ်းအစအဆုံး
မကောင်းသေးတာကြောင့်လည်း
ဖြစ်နိုင်ပါတယ်။
လုံခြုံရေးကြောင့်လည်း
ဖြစ်နိုင်ပါတယ်။
မတ်လွန်းတဲ့ တောင်ကြီးတွေ
ကွေ့လွန်းတဲ့ နေရာတွေ
အင်မတန်များတာကြောင့်ပါ
လမ်းမကောင်းသေးဘဲ
ယာဉ်များများသွားရင်
လမ်းကလည်း ကျဉ်းတော့
အန္တရာယ်များမှာ စိုးရပါတယ်။
@@ ဒီလမ်းမပေါ်မှာ
မတိုးတက်သေးတဲ့
လူနေမှုစနစ်တွေ
မတိုးတက်သေးတဲ့
လမ်းပန်းဆက်သွယ်ရေးတွေ
မမိတမိဖုန်းလိုင်းနေရာတွေ
လုံးဝမမိတဲ့ ဖုန်းလိုင်းနေရာတွေ
ပြည့်နှက်နေလေရဲ့။
ဒီလမ်းမပေါ်မှာ
အရေးပေါ် ကျန်းမာရေးအတွက်ဆို
ပူပန်စရာ ရှိနေသေးတယ်။
မမိသေးတဲ့ ဖုန်းလိုင်းတွေ
ရှိနေလေရဲ့။
တာဝန်ရှိသူတွေ
ကြိုးစားရင်းနဲ့ တစ်ချိန်မှာ
တိုးတက်လာဖို့ ဆုတောင်းမိပါတယ်။
@@ ဒီလမ်းမပေါ်က
လူသားတွေ လူထုအကျိုးပြုနိုင်ဖို့
သူတို့ ပညာ ကောင်းကောင်းတတ်ဖို့လိုပါတယ်။
သူတို့ ကျန်းမာကြံ့ခိုင်ဖို့လိုပါတယ်။
သူတို့ လူမှုစီးပွားဖွံ့ဖြိုးဖို့လိုပါတယ်။
လိုနေတာတွေထဲက
အဓိကအခြေခံကတော့
ဒီလမ်းမကြီး အမြန်ဆုံး
အဆင့်မြင့်မားတိုးတက်
ကောင်းမွန်လာဖို့ဘဲဖြစ်ပါတယ်။
မြတ်မျိုးမြင့်မာန်(၁၀.၁၁.၁၈)
No comments:
Post a Comment