ပန်းဆုတောင်း

 

ဘဝဟူသည်

ဟိုတောင်ဆီက မိုးရိပ်တွေညို

လွမ်းစိတ်တွေပို

တစ်နယ်စီခြား ဘဝတွေကို

ကံကြမ္မာကကြို

တစ်ချိန်ကာလ တို့တွေများ

ပြန်ဆုံကြမည်လား။

မှိုင်း(ဓာတု)

(၂၁.၁၀.၁၈)

 

မိုင်းဆတ်သိပါစေ။

 

ဒီတောင်တန်း

ဒီလယ်ကွင်းကြားမှာ

ကျွန်တော်တာဝန်ကျတဲ့

ရုံးလေးရှိပါတယ်။

တောင်တွေမြင်လို့

တောတွေတော့မဟုတ်ပါဘူး။

လယ်တွေမြင်လို့

ရွာတွေတော့မဟုတ်ပါဘူး။

မိုင်းဆတ်တောင်တန်းကြားက

မိုင်းဆတ်မြို့က ရုံးများပါ။

လယ်ကွင်းကြားကမြို့.....

တောင်တန်းကြားကမြို့....

ယနေ့ထိ

စိမ်းလန်းစိုပြည်တဲ့မြို့

ငြိမ်းချမ်းသာယာတဲ့မြို့....

ဒီမြို့လေးရဲ့ အစဥ်အလာကောင်း

အမြဲကောင်းအောင်

ထိန်းသိမ်းကြစေလိုပါတယ်။

ဒီနေရာဒီဒေသ

ဘယ်နှစ်ခါလာရလာရ

အေးချမ်းနေတဲ့အလှ

ထာဝရ မြင်ချင်လှပါတယ်

ချစ်တဲ့မိုင်းဆတ်ရေ။

စိုင်းမြင့်ဝင်းလှ (ရှမ်းအရှေ့)

၁၇.၁၀.၂၀၂၁

ဆောင်းအဝင်

 

လျော့ကြ

 

မိရိုးဖလာ ဗုဒ္ဓဘာသာတွေ

ကိုးကွယ်ရာဘာသာကို

ထဲထဲဝင်ဝင်သိအောင်

မလေ့လာကြတဲ့အခါ

မကျင့်သုံးကြတဲ့အခါ

လောဘတွေတက်လည်း

သတိကမရှိ.......

အသိကမရှိ..........

ဒေါသတွေထွက်လည်း

သတိကမရှိ.......

အသိကမရှိ..........

မောဟတွေဖက်လည်း

သတိကမရှိ.......

အသိကမရှိ..........

ခုတော့

သောကပင်လယ်တွေနဲ့

ပြည့်နေသည့် ဝန်းကျင်တွေကြား

ဟိုသွားလည်းမရ

ဒီလာလည်းဒုက္ခ

ဒုက္ခ ဒုက္ခ ဒုက္ခ

လောဘတွေကို လျော့ချ

ဒေါသတွေကို လျော့ချ

မောဟတွေကို လျော့ချ

အားလုံး အားလုံး အားလုံး လျော့ကြ။

မြတ်မျိုးမြင့်မာန်

(၃၀.၉.၂၀၂၁)

ကျွန်တော်နဲ့တိုက်ပုံ

 

တိုက်ပုံဝတ်တိုင်းလည်း

ဇိမ်ကျကျနဲ့ နေလိုက်ရမယ်

မထင်ပါနဲ့ကွယ်။

တိုက်ပုံဝတ်ပြီး

လမ်းကြမ်းပါသော

ရွှံ့နွံတောကို

ဖြတ်လျှောက်ချင်လည်း

လျှောက်ရမယ်။

တိုက်ပုံဝတ်ပြီး

လမ်းကြမ်းကြမ်းမှာ

ယာဉ်ဆန်းဆန်းကိုစီးပြီး

ခရီးအဝေးကို

သွားချင်လည်းသွားရမယ်။

ဒါပေမယ့်

တိုက်ပုံသမိုင်း

မရိုင်းရအောင်

တိုက်ပုံဝတ်သူကတော့

ထိန်းသိမ်းရပါမယ်။

အကျွန်ကတော့

တိုက်ပုံဝတ်လျက်

ပညာရေးလမ်း

စဉ်ဖြောင့်တန်းဖို့

တတ်စွမ်းသမျှ

ပေးဆပ်ကြရန်

ဘဝနှင့်ပါ ဖြစ်တည်လာသော

ပညာပန်းခင်း ပန်းတစ်ခြင်းသာ

ဖြစ်လိုပါ၏။

ဦးမြင့်ဝင်းလှ

ဒုတိယမြို့နယ်ပညာရေးမှူး(ပညာ)

အဆင်ပြေအောင်ပေါင်းသင်းနေထိုင်ဆက်ဆံပါ

 

ကိုယ့်ထက် ရာထူးငယ်ငယ်

ရာထူးကြီးကြီး ရာထူးတူတူ

အဆင်ပြေအောင်ပေါင်းသင်းနေထိုင်ဆက်ဆံပါ။

ကိုယ့်ထက် အသက်ငယ်ငယ်

အသက်ကြီးကြီး အသက်တူတူ

အဆင်ပြေအောင်ပေါင်းသင်းနေထိုင်ဆက်ဆံပါ။

ကိုယ့်ထက် ငွေကြေးချမ်းသာမှုမရှိလည်း

ငွေကြေးပိုမိုချမ်းသာလည်း ငွေကြေးချမ်းသာမှုတူလည်း

အဆင်ပြေအောင်ပေါင်းသင်းနေထိုင်ဆက်ဆံပါ။

ကိုယ့်ထက် ရုပ်မလှလှ

ရုပ်လှလှ ရုပ်ချင်းဆင်ဆင်

အဆင်ပြေအောင်ပေါင်းသင်းနေထိုင်ဆက်ဆံပါ။

အစစအရာရာ မည်သူနဲ့မဆို

အဆင်ပြေအောင်ပေါင်းသင်းနေထိုင်ဆက်ဆံပါမိတ်ဆွေ

သင့်လုပ်ငန်းဆောင်တာတွေ အောင်မြင်သွားမှာပါလေ။

ဦးမြင့်ဝင်းလှ(ပညာရေး) ၂၁.၉.၂၀၂၁